Wararka

Faah faahino ka soo Baxaya Dagaalo ka dhacay Gobolka Shabeellaha hoose

Dagaalada aad u Cuslaa ayaa shalay Gelinkii dambe  iyo xalay waxa  uu  ka kala dhacay  degmada Awdheegle iyo deegaanka Bariire  ee Gobolka Shabeellaha hoose,waxaana uu u dhaxeeyey Ciidamada Dowladda Soomaaliya ee dhawaan degmadaasi la wareegay iyo Ururka Al-Shabaab.

Dagaalka ayaa yimid kadib markii ay Al-Shabaab weerareen Saldhigyada Cusub ee Ciidamada Dowladda ay ka sameesteen degmada Awdheegle,waxaana dadka deegaanka ay sheegeen in uu dhacay dagaal culus oo mudo saacado ka badan socday.

Saraakiil ka tirsan Ciidamada xoogga dalka ayaa waxaa ay sheegeen in Al-Shabaab ay doonayeen inay dib ula wareegaan degmada Awdheegle, hayeeshee  Ciidamada DANAB  ee ku sugan halkaasi ay  iska  Caabiyeen weerarkii kaga yimid dhinaca Al-Shabaab.

Al-Shabaab Oo dhankooda ka hadlay dagaalkaas ayaa Baraha ay Internet-ka ku leeyihiin waxaa ay ku qoreen inay Gaari Cabdi Bille ah gubeen  intii uu socday dagaalka u dhaxeeyay iyaga iyo Ciidamada dowladda, hayeeshee aysan jirin ilo madax bannaan oo xaqiijinaya warkaas.

Dhinaca kale Al-Shabaab ayaa Xalay waxaa ay weerar ku qaadeen Saldhig Ciidamada Uganda ee qeybta ka ah AMISOM ku leeyihiin deegaanka Bariire ee gobolka Shabeellaha hoose oo dhowr bilood ka hor lala Wareegay,waxaana halkaasi ka dhacay dagaal,sida ay dadka deegaanka sheegeen.

Dagaalka ka dhacay deegaanka Bariire ayaanan ilaa iyo hadda laga heyn wax faah faahin ah,waxaana Wararkii ugu dambeeyay ee saakay naga soo gaaraya deegaannada lagu dagaalamay ay sheegayaan in Ciidamada Dowladda dhaq dhaqaaqyo Xoogan  ka wadaan,isla markaana ay ku doonayaan inay kula Wareegaan deegaano kale.

Leave a Reply

Your email address will not be published. Required fields are marked *